0:00
/
1ܘܦܠܸܛܠܹܗ ܝܼܫܘܿܥ ܡ̣ܢ ܗܲܝܟܠܵܐ ܘܒܹܐܙܵܠܵܐ ܗ݇ܘܵܐ: ܘܐ݇ܬܹܐܠܗܘܿܢ ܬܲܠܡܝܼܕܘܼ̈ܗܝ ܠܡܲܚܙܘܼܝܹܗ ܒܸܢܝܵܢܹܗ ܕܗܲܝܟܠܵܐ. 2ܐܝܼܢܵܐ ܗ̇ܘ ܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܵܝܗܝ: ܠܹܐ ܝܬܘܿܢ ܒܸܚܙܵܝܵܐ ܐܲܢܹܐ ܟܠܵܝܗܝ: ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܗܵܘܹܐ ܫܒ̣ܝܼܩܵܐ ܠܲܐܟ̣ܵܐ ܟܹܐܦܵܐ ܥܲܠ ܟܹܐܦܵܐ ܕܠܵܐ ܦܵܐܹܫ ܣܬܝܼܪܵܐ. 3ܘܟܲܕ ܝܬܸܒ̣ܠܹܗ ܥܲܠ ܛܘܼܪܵܐ ܕܙܲܝܬܹ̈ܐ: ܐ݇ܬܹܐܠܗܘܿܢ ܠܟܸܣܠܹܗ ܬܲܠܡܝܼܕܘܼ̈ܗܝ ܒܢܲܦ̮ܫܵܝܗܝ: ܒܹܐܡܵܪܵܐ: ܐَܡܘܿܪ ܐܸܠܲܢ ܐܝܼܡܲܢ ܐܲܢܹܐ ܒܸܬ ܗܵܘܝܼ: ܘܡܘܼܕܝܼ ܝܠܹܗ ܢܝܼܫܲܢܩܵܐ ܕܐܬܵܝܬܘܼܟ ܘܕܬܝܵܡܹܗ ܕܥܵܠܡܵܐ. 4ܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܗَܘܹܝܡܘܿܢ ܗܸܫܝܵܪ ܕܐ݇ܢܵܫܵܐ ܠܵܐ ܡܲܚܠܸܛ ܠܵܘܟ̣ܘܿܢ. 5ܣܵܒܵܒ ܪܵܒܵܐ ܒܸܬ ܐܵܬܝܼ ܒܫܸܡܝܼ: ܒܹܐܡܵܪܵܐ: ܐܵܢܵܐ ܝܘܸܢ ܡܫܝܼܚܵܐ: ܘܠܪܵܒܵܐ ܒܸܬ ܡܲܚܠܸܛܝܼ. 6ܐܝܼܢܵܐ ܗܕܝܼܪܹܐ ܝܬܘܿܢ ܠܸܫܡܲܥܝܵܐ ܦܠܵܫܹ̈ܐ ܘܒܘܼܬ ܕܦܠܵܫܹ̈ܐ. ܚܙܹܝܡܘܿܢ ܕܠܵܐ ܫܵܓ̣ܫܝܼܬܘܿܢ: ܣܵܒܵܒ ܘܵܓ̰ܸܒ ܝ݇ܠܵܗ̇ ܕܟܠܵܝܗܝ ܗܵܘܝܼ: ܐܸܠܵܐ ܗܸܫ ܠܹܐ ܝܠܹܗ ܬܝܵܡܵܐ. 7ܣܵܒܵܒ ܕܒܸܬ ܩܵܝܸܡ ܛܵܝܸܦܵܐ ܥܲܠ ܛܵܝܸܦܵܐ: ܘܡܲܠܟܘܼܬܵܐ ܥܲܠ ܡܲܠܟܘܼܬܵܐ: ܘܒܸܬ ܗܵܘܝܼ ܟܸܦܢܹ̈ܐ ܘܪ̈ܵܘܕܵܢܹܐ ܒܕܘܼܟܵܐ ܕܘܼܟܵܐ. 8ܐܝܼܢܵܐ ܐܲܢܹܐ ܟܠܵܝܗܝ ܪܹܫܵܐ ܕܚܸܒ̣ܠܹܐ ܝܢܵܐ. 9ܗ̇ܝܓܵܗ ܒܸܬ ܣܵܦܝܼ ܠܵܘܟ̣ܘܿܢ ܠܐܘܼܠܨܵܢܵܐ: ܘܒܸܬ ܩܵܛܠܝܼ ܠܵܘܟ̣ܘܿܢ: ܘܒܸܬ ܦܵܝܫܝܼܬܘܿܢ ܣܸܢܝܹܐ ܡ̣ܢ ܟܠܵܝܗܝ ܛܵܝܸܦܹ̈ܐ: ܒܚܵܬܸܪ ܕܫܸܡܝܼ. 10ܗ̇ܝܓܵܗ ܒܸܬ ܟܵܦܪܝܼ ܪܵܒܵܐ: ܘܒܸܬ ܣܵܦܝܼ ܚܲܕَ ܠܗ̇ܘ ܐ݇ܚܹܪ݇ܢܵܐ: ܘܒܸܬ ܣܵܢܝܼ ܚܲܕَ ܠܗ̇ܘ ܐ݇ܚܹܪ݇ܢܵܐ. 11ܘܪܵܒܵܐ ܢܒ̣̈ܝܹܐ ܕܲܓܵܠܹ̈ܐ ܒܸܬ ܩܵܝܡܝܼ: ܘܒܸܬ ܡܲܚܠܸܛܝܼ ܠܪܵܒܵܐ. 12ܘܡܣܵܒܵܒ ܕܒܘܼܫܵܝܝܼ ܕܥܵܘܠܵܐ: ܒܸܬ ܦܵܝܸܚ ܚܘܼܒܵܐ ܕܪܵܒܵܐ. 13ܐܝܼܢܵܐ ܡ̇ܢ ܕܚܵܡܸܠ ܗܲܠ ܐَܚܲܪܬܵܐ: ܗ̇ܘ ܒܸܬ ܚܵܝܹܐ. 14 ܒܸܬ ܦܵܝܫܵܐ ܡܘܼܟܪܸܙܬܵܐ ܐܵܗܵܐ ܡܲܫܚܲܕܬܵܐ ܕܡܲܠܟܘܼܬܵܐ ܒܟܠܵܗ̇ ܕܘܼܢܝܹܐ: ܠܣܵܗܕܘܼܬܵܐ ܠܟܠܵܝܗܝ ܛܵܝܸܦܹ̈ܐ: ܘܗ̇ܝܓܵܗ ܒܸܬ ܐܵܬܹܐ ܬܝܵܡܵܐ. 15ܗܲܕܟ̣ܵܐ ܐܝܼܡܲܢ ܕܚܵܙܹܝܬܘܿܢ ܢܝܼܫܲܢܩܵܐ ܛܲܢܦܵܐ ܕܚܵܪܵܒ̣ܝܘܼܬܵܐ ܕܦܸܫܠܹܗ ܐَܡܝܼܪܵܐ ܒܝܲܕ ܕܵܢܝܼܐܹܝܠ ܢܒ̣ܝܼܵܐ: ܒܸܟܠܵܝܵܐ ܒܕܘܼܟܬܵܐ ܩܲܕܝܼܫܬܵܐ: ܗ̇ܘ ܕܩܵܪܹܐ ܦܲܪܡܵܐ. 16ܗ̇ܝܓܵܗ ܐܵܢܝܼ ܕܒܝܼܗܘܼܕܵܐ: ܥܵܪܩܝܼ ܠܛܘܼܪ̈ܵܢܹܐ. 17ܘܗ̇ܘ ܕܥܲܠ ܐ݇ܓܵܪܹܐ ܠܵܐ ܨܵܠܹܐ ܠܸܫܩܵܠܵܐ ܡܸܢܕܝܼ ܕܓܵܘ ܒܲܝܬܹܗ. 18ܘܐܲܝܢܝܼ ܕܓܵܘ ܚܲܩܠܵܐ ܠܵܐ ܕܵܝܸܪ ܠܒܵܬَܪܹܗ ܠܸܫܩܵܠܵܐ ܠܒܸܫܬܹܗ. 19ܐܝܼܢܵܐ ܘܵܝ ܠܐܵܢܝܼ ܕܝܼܢܵܐ ܒܛܝܼܢܹ̈ܐ: ܘܠܐܵܢܝܼ ܕܡܲܡܸܨܝܼ ܒܐܵܢܝܼ ܝܵܘܡܵܢܹ̈ܐ. 20ܐܝܼܢܵܐ ܨܵܠܹܝܡܘܿܢ ܕܠܵܐ ܗܵܘܹܐ ܥܪܵܩܵܘܟ̣ܘܿܢ ܒܣܸܬܘܵܐ: ܘܠܵܐ ܒܫܲܒܬܵܐ. 21ܣܵܒܵܒ ܗ̇ܝܓܵܗ ܒܸܬ ܗܵܘܹܐ ܐܘܼܠܨܵܢܵܐ ܓܘܼܪܵܐ: ܐܲܝܢܝܼ ܕܠܵܐ ܗَܘܹܐܠܹܗ ܡ̣ܢ ܫܘܼܪܵܝܹܗ ܕܥܵܠܡܵܐ ܘܗܲܠ ܐܵܕܝܼܵܐ: ܘܐܘܼܦ ܠܹܐ ܗܵܘܹܐ. 22ܘܐܸܢ ܠܵܐ ܗܵܘܝܼ ܗ݇ܘܵܘ ܡܘܼܟܪܝܹܐ ܐܵܢܝܼ ܝܵܘܡܵܢܹ̈ܐ: ܠܹܐ ܚܲܝܹܐ ܗ݇ܘܵܐ ܟܠܹܗ ܒܸܣܪܵܐ. ܐܝܼܢܵܐ ܣܵܒܵܒ ܕܓܘܼܒ̇ܝܹ̈ܐ: ܒܸܬ ܦܝܫܝܼ ܡܘܼܟܪܝܹܐ ܐܵܢܝܼ ܝܵܘܡܵܢܹ̈ܐ. 23ܗ̇ܝܓܵܗ ܐܸܢ ܐ݇ܢܵܫܵܐ ܐܵܡܸܪ ܐܸܠܵܘܟ̣ܘܿܢ: ܗܵܐ: ܠܲܐܟ̣ܵܐ ܝܠܹܗ ܡܫܝܼܚܵܐ: ܝܲܢ ܬܵܡܵܐ ܝܠܹܗ: ܠܵܐ ܗܲܡܸܢܝܼܬܘܿܢ. 24ܣܵܒܵܒ ܕܒܸܬ ܩܵܝܡܝܼ ܡܫܝܼܚܹ̈ܐ ܕܲܓܵܠܹ̈ܐ: ܘܢܒ̣̈ܝܹܐ ܕܲܓܵܠܹ̈ܐ: ܘܒܸܬ ܝܵܗَܒ̣ܝܼ ܢܝܼܫܲܢܩܹ̈ܐ ܓܘܼܪܹ̈ܐ ܘܥܵܓ̰ܸܒܘܵܬ̈ܵܐ: ܐܲܝܟܼ ܕܡܲܚܠܸܛܝܼ: ܐܸܢ ܡܵܨܝܵܐ: ܐܘܼܦ ܠܓܘܼܒ̇ܝܹ̈ܐ. 25ܗܵܐ: ܡܩܵܕَܡܵܝܬܵܐ ܐَܡܸܪܝܼ ܐܸܠܵܘܟ̣ܘܿܢ. 26ܒܲܣ ܐܸܢ ܗܲܕܟ̣ܵܐ ܐܵܡܪܝܼ ܠܵܘܟ̣ܘܿܢ: ܗܵܐ: ܓܵܘ ܒܲܪܝܼܵܐ ܝܠܹܗ: ܠܵܐ ܦܵܠܛܝܼܬܘܿܢ: ܗܵܐ: ܒܟܘܼܚܝܵܬܹ̈ܐ ܝܠܹܗ: ܠܵܐ ܗܲܡܸܢܝܼܬܘܿܢ. 27ܣܵܒܵܒ ܕܵܐܟ̣ܝܼ ܕܒܸܪܩܵܐ ܦܵܠܸܛ ܡ̣ܢ ܡܲܕܢ̱ܚܵܐ: ܘܦܵܐܹܫ ܚܸܙܝܵܐ ܗܲܠ ܡܲܥ̱ܪܒ̣ܵܐ: ܗܲܕܟ̣ܵܐ ܒܸܬ ܗܵܘܝܵܐ ܐَܬܵܝܬܹܗ ܕܒܪܘܿܢܹܗ ܕܐ݇ܢܵܫܵܐ. 28ܘܐܲܝܟܵܐ ܕܗܵܘܝܵܐ ܫܠܲܕܵܐ ܬܵܡܵܐ ܒܸܬ ܓ̰ܵܡܥܝܼ ܢܸܫܪܹ̈ܐ. 29ܐܝܼܢܵܐ ܕܲܪܣܵܥܲܬ ܡܒܵܬَܪ ܝܲܠܨܘܼܝ ܕܐܵܢܝܼ ܝܵܘܡܵܢܹ̈ܐ: ܫܸܡܫܵܐ ܒܸܬ ܚܵܒܼܹܐ: ܘܣܲܗܪܵܐ ܠܹܐ ܝܵܗَܒܸܠ ܒܲܗܪܹܗ: ܘܟܵܘܟ̣ܒܹ̈ܐ ܒܸܬ ܢܵܦܠܝܼ ܡ̣ܢ ܫܡܲܝܵܐ: ܘܚܲܝܠܹ̈ܐ ܕܫܡܲܝܵܐ ܒܸܬ ܦܵܝܫܝܼ ܫܥܝܼܫܹܐ. 30ܘܗ̇ܝܓܵܗ ܒܸܬ ܦܵܐܹܫ ܚܸܙܝܵܐ ܢܝܼܫܲܢܩܹܗ ܕܒܪܘܿܢܹܗ ܕܐ݇ܢܵܫܵܐ ܒܫܡܲܝܵܐ: ܘܗ̇ܝܓܵܗ ܒܸܬ ܥܵܒ̣ܕܝܼ ܬܵܙܝܼ ܟܠܵܝܗܝ ܐܘܼ̈ܓ̰ܵܓܹܐ ܕܐܲܪܥܵܐ: ܘܒܸܬ ܚܵܙܝܼ ܠܒܪܘܿܢܹܗ ܕܐ݇ܢܵܫܵܐ ܒܹܐܬܵܝܵܐ ܥܲܠ ܥܢܵܢܹ̈ܐ ܕܫܡܲܝܵܐ: ܥܲܡ ܚܲܝܠܵܗ̇ ܘܚܸܩܪܵܐ ܓܘܼܪܵܐ. 31ܘܒܸܬ ܫܵܕܸܪ ܡܲܠܲܐܟ̣ܘܼ̈ܗܝ ܥܲܡ ܩܵܠܵܐ ܓܘܼܪܵܐ ܕܫܝܼܦܘܿܪܵܐ: ܘܒܸܬ ܓ̰ܵܡܥܝܼ ܠܓܘܼܒ̇ܝܹ̈ܐ ܕܝܹܗ ܡ̣ܢ ܐܲܪܒܥܵܐ ܦܵܘܚܹ̈ܐ: ܡ̣ܢ ܪܹܫܵܝܗܝ ܕܫܡܲܝܵܐ ܘܗܲܠ ܪܹܫܵܝܗܝ. 32ܘܡ̣ܢ ܐܝܼܠܵܢܵܐ ܕܬܹܐܢܵܐ ܝܠܘܿܦܘܿܢ ܡܵܣܵܠܵܐ: ܟܲܕ ܦܲܥܘܵܢܘܼ̈ܗܝ ܐܵܕܝܼܵܐ ܗܵܘܝܼ ܪ̈ܵܟܝܼܟܹܐ ܘܒܲܪܛܸܢܝܼ ܛܲܪ̈ܦܘܼܗܝ: ܟܹܐ ܝܵܕܥܝܼܬܘܿܢ ܕܡܛܹܐܠܹܗ ܩܲܝܛܵܐ. 33ܗܲܕܟ̣ܵܐ ܐܘܼܦ ܐܲܚܬܘܿܢ: ܐܝܼܡܲܢ ܕܚܵܙܹܝܬܘܿܢ ܐܲܢܹܐ ܟܠܵܝܗܝ: ܝܕܸܥܡܘܿܢ ܕܡܛܹܠܵܗ̇ ܠܬܲܪܥܵܐ. 34ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܠܹܐ ܥܵܒ̣ܪܵܐ ܐܵܗܵܐ ܐܘܼܓ̰ܵܓ̣: ܗܲܠ ܕܐܲܢܹܐ ܟܠܵܝܗܝ ܗܵܘܝܼ. 35ܫܡܲܝܵܐ ܘܐܲܪܥܵܐ ܒܸܬ ܥܵܒ̣ܪܝܼ: ܐܝܼܢܵܐ ܗܹܡܸܙܡܵܢܝܼ̈ ܠܹܐ ܥܵܒ̣ܪܝܼ. 36ܐܝܼܢܵܐ ܥܲܠ ܕܗ̇ܘ ܝܵܘܡܵܐ ܘܥܲܠ ܕܗ̇ܝ ܣܵܥܲܬ: ܐ݇ܢܵܫܵܐ ܠܹܐ ܝܵܕܸܥ: ܐܘܼܦ ܠܵܐ ܡܲܠܲܐܟܹ̈ܐ ܕܫܡܲܝܵܐ: ܐܸܠܵܐ ܒܵܒܵܐ ܒܢܲܦ̮ܫܹܗ. 37ܐܝܼܢܵܐ ܕܵܐܟ̣ܝܼ ܕܝܵܘܡܵܢܹ̈ܐ ܕܢܘܿܚ: ܗܲܕܟ̣ܵܐ ܒܸܬ ܗܵܘܝܵܐ ܐܬܵܝܬܹܗ ܕܒܪܘܿܢܹܗ ܕܐ݇ܢܵܫܵܐ. 38ܣܵܒܵܒ ܕܵܐܟ̣ܝܼ ܕܝܼܗ݇ܘܵܘ ܒܝܵܘܡܵܢܹ̈ܐ ܕܩܵܕَܡ ܛܵܘܦܵܢܵܐ: ܒܹܐܟ̣ܵܠܵܐ ܘܒܸܫܬܵܝܵܐ: ܒܸܓܒ̣ܵܪܵܐ ܘܡܲܓܒ̣ܘܼܪܹܐ: ܗܲܠ ܝܵܘܡܵܐ ܕܥܒܼܸܪܹܗ ܢܘܿܚ ܠܩܹܒ̣ܘܼܬܵܐ. 39ܘܠܵܐ ܝܕܸܥܠܗܘܿܢ ܗܲܠ ܕܐَܬܹܐܠܹܗ ܛܵܘܦܵܢܵܐ: ܘܠܘܼܒܸܠܹܗ ܠܟܠܵܝܗܝ: ܗܲܕܟ̣ܵܐ ܒܸܬ ܗܵܘܝܵܐ ܐܬܵܝܬܹܗ ܕܒܪܘܿܢܹܗ ܕܐ݇ܢܵܫܵܐ. 40ܗ̇ܝܓܵܗ ܬܪܹܝ ܒܸܬ ܗܵܘܝܼ ܒܚܲܩܠܵܐ: ܚܲܕَ ܒܸܬ ܦܵܐܹܫ ܠܘܼܒܠܵܐ: ܘܚܲܕَ ܒܸܬ ܦܵܐܹܫ ܫܒ̣ܝܼܩܵܐ. 41ܘܬܲܪܬܹܝ ܒܸܬ ܗܵܘܝܼ ܒܸܓܪܵܣܵܐ ܒܓܵܪܘܿܣܬܵܐ: ܚܕܵܐ ܒܸܬ ܦܵܝܫܵܐ ܠܘܼܒܸܠܬܵܐ: ܘܚܕܵܐ ܒܸܬ ܦܵܝܫܵܐ ܫܒ̣ܝܼܩܬܵܐ. 42ܥܒ̣ܘܿܕܘܿܢ ܫܵܗܲܪܬܵܐ ܗܲܕܟ̣ܵܐ: ܣܵܒܵܒ ܕܠܹܐ ܝܵܕܥܝܼܬܘܿܢ ܒܐܲܝܢܝܼ ܝܵܘܡܵܐ ܒܹܐܬܵܝܵܐ ܝܠܹܗ ܡܵܪܵܘܟ̣ܘܿܢ. 43ܐܝܼܢܵܐ ܐܵܗܵܐ ܝܕܸܥܡܘܿܢ: ܕܐܸܢ ܝܵܕܸܥ ܗ݇ܘܵܐ ܡܵܪܵܐ ܕܒܲܝܬܵܐ ܒܐܲܝܢܝܼ ܒܲܕܠܵܐ ܐܵܬܹܐ ܗ݇ܘܵܐ ܓܹܢܵܒ̣ܵܐ: ܒܸܬ ܥܵܒܸܕ ܗ݇ܘܵܐ ܫܵܗܲܪܬܵܐ: ܘܠܹܐ ܫܵܒܸܩ ܗ݇ܘܵܐ ܕܦܵܐܹܫ ܒܸܙܥܝܵܐ ܒܲܝܬܹܗ. 44ܣܵܒܵܒ ܕܐܵܗܵܐ ܐܘܼܦ ܐܲܚܬܘܿܢ ܗَܘܹܝܡܘܿܢ ܗܵܙܸܪ: ܣܵܒܵܒ ܒܣܵܥܲܬ ܕܠܹܐ ܝܬܘܿܢ ܒܸܚܫܵܒ̣ܵܐ: ܒܹܐܬܵܝܵܐ ܝܠܹܗ ܒܪܘܿܢܹܗ ܕܐ݇ܢܵܫܵܐ. 45ܒܲܣ ܡܵܢܝܼ ܝܠܹܗ ܪܹܓܵܐ ܡܗܘܼܡܢܵܐ ܘܗܵܘܢܵܢܵܐ: ܕܡܘܼܩܸܡܠܹܗ ܐܵܓ̣ܵܝܹܗ ܥܲܠ ܒܢܲܝ̈ ܒܲܝܬܹܗ: ܕܝܵܗَܒܸܠ ܠܗ݇ܘܿܢ ܡܹܐܟ̣ܘܼܠܬܵܐ ܒܙܲܒ̣ܢܵܗ̇. 46ܛܘܼܒ̣ܵܐ ܠܗ̇ܘ ܪܹܓܵܐ: ܟܲܕ ܐܵܬܹܐ ܐܵܓ̣ܵܝܹܗ ܡܵܫَܟ̰ܸܚ ܠܹܗ ܒܸܥܒ̣ܵܕܵܐ ܗܲܕܟ̣ܵܐ. 47ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܕܒܸܬ ܡܲܩܸܡ ܠܹܗ ܥܲܠ ܟܠ ܕܐܝܼܬ ܠܹܗ. 48ܐܝܼܢܵܐ ܐܸܢ ܐܵܡܸܪ ܗ̇ܘ ܪܹܓܵܐ ܒܝܼܫܵܐ ܒܠܸܒܹܗ: ܕܐܵܓ̣ܵܝܝܼ ܥܲܪܩܘܼܠܹܐ ܝܠܹܗ ܠܹܐܬܵܝܵܐ. 49ܘܫܵܪܹܐ ܠܸܡܚܵܝܵܐ ܠܚܲܒ̣ܪ̈ܵܘܵܬܹܗ: ܘܗܵܘܹܐ ܒܹܐܟ̣ܵܠܵܐ ܘܒܸܫܬܵܝܵܐ ܥܲܡ ܪܵܘܵܝܹܐ. 50ܒܸܬ ܐܵܬܹܐ ܐܵܓ̣ܵܝܹܗ ܕܗ̇ܘ ܪܹܓܵܐ ܒܝܵܘܡܵܢܹ̈ܐ ܕܠܹܐ ܚܵܫܸܒ̣: ܘܒܣܵܥܲܬ ܕܠܹܐ ܝܵܕܸܥ. 51ܘܒܸܬ ܦܲܠܹܐ ܠܹܗ ܠܬܪܹܝ: ܘܒܸܬ ܡܬܸܒܼܠܹܗ ܣܵܡܹܗ ܥܲܡ ܢܵܣܒܲܝ̈ ܒܐܲܦܹ̈ܐ. ܬܵܡܵܐ ܒܸܬ ܗܵܘܹܐ ܒܸܟ̣ܝܵܐ ܘܚܲܪܚܲܟ̰ܬܵܐ ܕܟܹܟܹ̈ܐ.